గుంటూరు: ముఖ్యమంత్రి చంద్రబాబు మాటలకు అర్థాలే వేరులే అని మాజీ మంత్రి, వైయస్ఆర్ సీపీ గుంటూరు జిల్లా అధ్యక్షుడు అంబటి రాంబాబు విమర్శించారు. తడిగుడ్డలతో గొంతులు కోసే నైజం నారా చంద్రబాబు సొంతమని అన్నారు. ఈ దేశంలోనే రాజకీయాల్లో అత్యంత విశ్వాసఘాతకుడు ఎవరైనా ఉన్నారంటే అది ఒక్క నారా చంద్రబాబు మాత్రమేనని మండిపడ్డారు. చంద్రబాబు రాజకీయ జీవితం మొత్తం కక్షలు, కుట్రలు, మోసాలతోనే నిండి ఉందని అన్నారు. గుంటూరులోని క్యాంప్ కార్యాలయంలో మాజీ మంత్రి, వైయస్ఆర్ సీపీ గుంటూరు జిల్లా అధ్యక్షుడు అంబటి రాంబాబు గురువారం మీడియాతో మాట్లాడారు. పత్రికల్లో కొన్ని కొన్ని విషయాలు చూస్తున్నప్పుడు చాలా ఆశ్చర్యంగా అనిపిస్తాయి. ఈ రోజు తెలుగుదేశంకు బాకా ఊదే పత్రికలో ప్రధాన శీర్షికగా కక్షసాధింపు అనేది నా లక్ష్యం కాదు అని చంద్రబాబు అన్నట్లుగా రాశారు. దీనిని చూసి ఆశ్చర్యం వేసింది. నిర్ఘాంత పోయే అంశం ఇది. ఈ సందర్బంగా పాత సినిమాలో ఒక పాట గుర్తుకువస్తోంది. ఆడవారి మాటలకు... అర్థాలే వేరులే అని...అన్నట్లుగా చంద్రబాబు గారి మాటలకు అర్థాలే వేరులే... అర్థాలే వేరులే... అవునంటే కాదనిలే... కాదంటే అవునని లే... అనే అన్వయించుకోవాలి. చంద్రబాబు నాకు కక్ష లేదు అంటే... చాలా కక్ష ఉందని అర్థం... నేను నిప్పులాంటి మనిషిని అంటే.. ఆయన తుప్పు అని అర్థం. నేను అసలు తప్పే చేయను అంటే... నిత్యం తప్పులే చేస్తాను అని అర్థం. నా అంత విశ్వసనీయుడు ఎవరూ లేరు అని అంటే... అంత విశ్వాసఘాతకుడు ఈ దేశంలోనూ, రాజకీయాల్లోనూ ఎవరూ లేరని అర్థం. అందరినీ విశ్వసిస్తాను అంటే.. ఎవరినీ నమ్మనూ అని అర్థం. నేను అక్రమాలు చేయను అంటే... రోజూ అక్రమాలే చేస్తారని అర్థం. ఓటుకు కోట్లు కేసులో అడ్డంగా దొరికిపోయిన చంద్రబాబు ఉమ్మడి రాష్ట్రం విడిపోయిన తరువాత చంద్రబాబు హైదరాబాద్ లో ఒక ఎమ్మెల్సీని కొనుగోలు చేసేందుకు డబ్బులు సరఫరా చేస్తూ అడ్డంగా దొరికిపోయాడు. రెండు రాష్ట్రాల ప్రజలకు ఇది తెలుసు. మా వాళ్లు బ్రీఫ్డ్ మీ.. అంటూ ఆయన మాట్లాడిన మాటలను ప్రజలంతా విన్నారు. అంత లైవ్ లో దొరికిపోయినా కూడా నా అంత నిజాయితీపరుడు ఎవరూ లేరు నమ్మండి అని ఆయన అంటారు. అంత చక్కగా లైవ్ లో దొరికిపోయినా సరే, వ్యవస్థలను చక్కగా మేనేజ్ చేసుకోగలడు. ఎన్ని ఘోరాల నుంచి అయినా సరే తప్పుకుని బయటకు రాగలిన వ్యక్తి చంద్రబాబు. చంద్రబాబు ఎన్నికలు ముందు ఎన్ని అపవాదులు వేశాడు. ఏకంగా రూ. 14 వేల కోట్లు వైయస్ఆర్సిపి ప్రభుత్వం అప్పులు చేసింది అంటూ అబద్దాలు ప్రచారం చేశాడు. వాస్తవం ఏమిటా అని చూస్తూ కేవలం రూ. 6.46 లక్షల కోట్లు మాత్రమే. అంటే దాదాపు రెట్టింపు సంఖ్యతో అప్పుల చేశామంటూ మాపై నిందలు మోపాడు. అబద్దాలు చెప్పడంలో ఈ దేశంలోనే ఇంత గొప్ప వ్యక్తి ఎవరూ లేరు. ల్యాండ్ టైట్లింగ్ యాక్ట్ ను మేం అధికారంలోకి రాగానే రద్దు చేస్తానని అన్నాడు. ఇందులోని అంశాలను తనకు అనుకూలంగా మలుకుకున్నాడు. ప్రభుత్వ భవనాల రంగులకు వైయస్ఆర్ సిపి ప్రభుత్వం రూ.నాలుగు వేల కోట్లు ఖర్చు చేసిందని నిందలు వేశాడు. కేవలం రూ. వంద కోట్లే ఖర్చు చేసినట్లు తేల్చారు. అంతేకాదు వైయస్ఆర్సిపి ప్రభుత్వం ఈ రాష్ట్రాన్ని అప్పులతో శ్రీలంకగా మారుస్తోందని గగ్గోలు పెట్టాడు. కానీ ఆయన సీఎంగా కేవలం ఏడు నెలల కాలంలోనే ఏకంగా రూ.1.09 లక్షల కోట్లు అప్పులు తీసుకువచ్చాడు. విశ్వసనీయత గురించి మాట్లాడే హక్కు నారా చంద్రబాబుకు లేదు. అదృష్టంతోనే నాలుగుసార్లు సీఎం అయ్యాడు. ఏ రోజు కూడా ఇచ్చిన హామీలను అమలు చేయలేదు. ఆయన విశ్వాసఘాతకుడు, ఈ రోజు కక్షసాధింపు నా లక్ష్యం కాదు అని చెబుతున్నాడు. జగన్ పై చర్యకు సెకీ లడ్డూలా దొరికిందంటూ అడ్డగోలు మాటలు వైయస్ జగన్ పై చర్య తీసుకునేందుకు సెకీ వ్యవహారం లడ్డూలా దొరికింది అంటూ చంద్రబాబు మాట్లాడుతున్నాడు. నిజంగా అలా అవకాశం దొరికితే వదిలిపెట్టే వ్యక్తి చంద్రబాబేనా? దీనిలో ఏమీ లేదని తెలిసి, ఏమీ చేయలేని స్థితిలో ఉన్నాడు. ఆదానీపై ఏం చర్య తీసుకోలేను అంటున్నాడు. అమెరికాలో తేలితే కానీ ఏం చేయలేను అంటున్నాడు. అంటే అసలు ఈ వ్యవహారంలోనే ఏం లేదు అని అర్థమవుతోంది. జగన్ గారిపై యాక్షన్ తీసుకోవాలని అనుకుంటే, సెకీ నీకు లడ్డూలా దొరికితే ఎందుకు చర్య తీసుకోలేకపోతున్నారు. ఆదానీ మీద చర్య తీసుకునే ప్రశ్నే లేదంటున్నారు. ఆదానీ ఒప్పందంలో లంచాల ఆరోపణలు ఉన్నాయి కదా వాటిని రద్దు చేస్తారా...అంటే రద్దు చేయము అంటున్నారు. అంటే ఒక నాటకంగా ఈ వ్యవహారంను తనకు అనుకూలంగా మలుచుకుని మాట్లాడుతున్నాడు. వైయస్ఆర్ సీపీ కార్యాలయాల కూల్చివేత కక్షసాధింపు కాదా? తన హయాంలో కక్షసాధింపులు ఏమీ లేవని చంద్రబాబు అంటున్నారు. అధికారంలోకి రాగానే నిర్మాణంలో ఉన్న వైయస్ఆర్ సీపీ ఆఫీస్ లకు నోటీసులు ఇచ్చారు. మేం కోర్ట్ లకు వెళ్ళే అవకాశం కూడా ఇవ్వకుండా దుర్మార్గంగా శుక్రవారం రాత్రి వెళ్ళి నిర్మాణంలో ఉన్న మంగళగిరి వైయస్ఆర్ సిపి కార్యాలయంను కూల్చేశాడు. శని, ఆదివారాల్లో కోర్ట్ ఉండదనే ఉద్దేశంతో కక్షపూరితంగా పార్టీ ఆఫీస్ ను ధ్వంసం చేశాడు. ఇదీ చంద్రబాబు నిజస్వరూపం. విజయవాడ నడిబొడ్డులో రూ.250 కోట్లతో వైయస్ఆర్ సీపీ ప్రభుత్వం అంబేద్కర్ విగ్రహాన్ని ఆవిష్కరించింది. ఆనాడు సీఎంగా వున్న వైయస్ జగన్ గారి పేరును ఆవిష్కర్త అని శిలాఫలకంపై రాశారు. లైట్లను ఆపివేసి, రాత్రిపూట ఆ పేరును తొలగించి, అక్కడ విధ్వంసం సృష్టించిన మీరు కక్షసాధింపులు మా వైఖరి కాదూ అంటే ఎవరు నమ్ముతారు. కూటమి ప్రభుత్వం అధికారంలోకి వచ్చిన నాటి నుంచి ప్రతిరోజూ కక్షసాధింపులే కొనసాగుతున్నాయి. ఇళ్ల మీద దాడులు, హత్యలు, అఘాయిత్యాలు, ఆస్తులను ధ్వంసం చేశారు. ఊళ్ళనే ఖాళీ చేసి, వైయస్ఆర్ సిపి కార్యకర్తలు వలసలు వెళ్ళే పరిస్థితి కల్పించారు. పల్నాడు, రాయలసీమలో ఈ రోజుకూ కొంత మంది ఇతర ప్రాంతాల్లో తలదాచుకునే దౌర్భాగ్య పరిస్తితిని కల్పించింది చంద్రబాబు కాదా? ఐపీఎస్ ఆఫీసర్లపైనా కక్షసాధింపు చర్యలు చంద్రబాబును అరెస్ట్ చేసే సందర్భంలో వైయస్ఆర్ సిపి ప్రభుత్వానికి సహకరించాలనే అనుమానంతో కొందరు ఐపీఎస్ ఆఫీసర్లను ఎంత దారుణంగా వేధిస్తున్నారో అందరికీ తెలుసు. బొంబాయికి చెందిన ఒక నటి వ్యవహారంలో ముగ్గురు ఐపీఎస్ ఆఫీసర్ల మీద ఏకంగా కేసులు నమోదు చేయించాడు. పలువురు ఆఫీసర్లను సస్సెండ్ చేశాడు. సస్పెండ్ కాని ఆఫీసర్లకు కూడా పోస్టింగ్ లు ఇవ్వకుండా వేధిస్తున్నారు. ఐపీఎస్ ఆఫీసర్లు, ఉద్యోగులపైన కూడా కక్షసాధిస్తున్న చంద్రబాబు నేను వివేకానందుడు, బుద్దుడు, గాంధీ మహాత్ముడిని అని చెబితే నమ్మేందుకు ప్రజలు సిద్దంగా లేరు. చంద్రబాబు రాజకీయాలను నలబై ఏళ్ళుగా ప్రజలు గమనిస్తున్నారు. చంద్రబాబు, లోకేష్, తెలుగుదేశం పార్టీలపై సోషల్ మీడియా యాక్టివీస్ట్ లు రెండుమూడేళ్ళ కిందట పెట్టిన పోస్టులపై పోలీసులను ఉపయోగించి ఎటువంటి తప్పుడు కేసులు బనాయిస్తున్నారో అందరికీ తెలుసు. పోలీసులను మఫ్టీలో పంపి, దూరప్రాంతాల్లో కేసులు పెట్టి, సోషల్ మీడియా యాక్టివీస్ట్ లను ప్రతిరోజూ ఒక్కో పోలీస్ స్టేషన్ కు తిప్పుతూ రాక్షసానందం పొందుతున్నారు. ఒకే పోస్ట్ మీద ముప్పై నుంచి నలబై కేసులు పెడుతున్నారు. ఒక కేసులో బెయిల్ రాగానే, మరో కేసు మీద పిటీ వారెంట్ తీసుకుని అరెస్ట్ చేస్తున్నారు. దాదాపు రెండుమూడు నెలల పాటు సోషల్ మీడియా యాక్టివీస్ట్ లపై కేసుల పేరుతో తిప్పుతూ వేధింపులకు పాల్పడుతున్నారు. అటువంటి చంద్రబాబు కక్షసాధింపులకు దూరం అంటూ సన్నాయినొక్కులు నొక్కుతున్నారు. కానీ చంద్రబాబుకు వంతపాడే ఎల్లో మీడియాకు భారత రాజకీయాల్లో చంద్రబాబు అంత స్వచ్ఛమైన రాజకీయనాయకుడు మరొకరు లేరు అంటూ భజన చేస్తున్నాయి. అధికారం కోసం చంద్రబాబు ఎంతకైనా తెగిస్తాడు చంద్రబాబు కక్షసాధింపులు బయటకు కనిపించవు. తడిగుడ్డలతో గొంతులు కోసేవారు ఉంటారు. అలాంటి స్వభావం కలిగిన వ్యక్తి నారా చంద్రబాబు. తన అధికారం కోసం ఎంతకైనా తెగిస్తారు. కక్షలు, కుట్రలు, కుతంత్రాలకు ఎంతకైనా దిగజారే వ్యక్తి నారా చంద్రబాబు. మాజీ మంత్రి పేర్ని నానిపై కేసులు బనాయించారు. ఆయన అద్దెకు ఇచ్చిన గోడవున్ లో షార్టేజీ వచ్చిన బియ్యంను అడ్డం పెట్టుకుని క్రిమినల్ కేసు పెట్టారు. గత ప్రభుత్వంలో పేర్ని నాని మంత్రిగా పనిచేశాడు, తెలుగుదేశం పార్టీపైన తన గళాన్ని గట్టిగా వినిపిస్తున్నారనే కక్షతోనే ఆయనపై అక్రమ కేసులను బనాయిస్తున్నాడు. జరిమానాతో సరిపెట్టే కేసులో ఏకంగా క్రిమినల్ సెక్షన్లు నమోదు చేయడాన్ని ఎలా అర్థం చేసుకోవాలి. ఈ కేసులో బెయిల్ తెచ్చుకున్నప్పటికీ పేర్ని నాని సతీమణిని, ఒక కాపు సోదరీమణిని పోలీస్ స్టేషన్ కు విచారణ పేరుతో పిలిచి వేధింపులకు దిగుతారా? మానసికంగా వేధించడం కక్షసాధింపు కాదా? దీనికిసమాధానం చంద్రబాబు దగ్గర లేదు. మా మాజీ ఎమ్మెల్యే చెవిరెడ్డి భాస్కర్ రెడ్డి తన నియోజకవర్గంలో ఒక బాలికపైన దాడి జరిగితే, పరామర్శించడానికి వెళ్ళాడు. ఆయనపైన కూడా కుట్రపూరితంగా ఫోక్సో కేసు నమోదు చేశారు. బాలిక తండ్రితో సంతకం పెట్టించుకుని తప్పుడు కేసు పెట్టారు. ఇది కక్షసాధింపు చర్య కాదు అని చెప్పగలరా? ఇలా అనేక మందిపై అన్యాయమైన, అక్రమ కేసులు పెట్టి, మమ్మల్ని భయపెట్టాలని అనుకుంటున్నారు. ఇలాంటి బెదరింపులకు భయపడం. చివరికి పోలీసులను కూడా విభజించారు. గన్ మెన్లపైనా కూడా కక్ష సాధింపులా? చివరికి వైయస్ఆర్ సిపి నాయకులకు గన్ మెన్లు గా పనిచేసిన వారిని కూడా వేధింపులకు గురి చేస్తున్నారు. ఇలా ప్రతి అంశాన్ని చంద్రబాబు సీఎంగా అధికారం చేపట్టినప్పటి నుంచి చేస్తున్నది కక్షసాధింపే. అసలు రెడ్ బుక్ అనేది ఎక్కడి నుంచి వచ్చింది. తమకు నచ్చని వారి పేర్లు రెడ్ బుక్ లో రాయడం, వారిని లక్ష్యంగా చేసుకుని వేధింపులు, కేసులు, కుట్రలు చేయడం. పోలీస్ వ్యవస్థను తన జేబు సంస్థగా మార్చుకున్నాడు. మా పార్టీలో చేరితే నీ పైన ఎటువంటి కేసులు ఉండవు, చేరకపోతే నీపై అన్ని రకాలుగా కేసులు ఉంటాయని అంటున్నారు. అలా కొందరినీ తెలుగుదేశం, జనసేనల్లో చేర్పించుకుంటున్నారు. కక్షసాధింపులు తప్ప అభివృద్ది, సంక్షేమం లేదు అని ప్రజలు గమనించారు. పోలవరం పరిగెడుతుంది, అమరావతి అమెరికా అయిపోతుందని, రోడ్లు బ్రహ్మాండంగా వేస్తున్నారంటూ ఉదరగొడుతున్నారు. ఒక్క సంక్షేమ కార్యక్రమాన్ని కూడా అమలు చేయని విశ్వాసఘాతకుడు నారా చంద్రబాబు. సూపర్ సిక్స్ అట్టర్ ఫ్లాప్ అట్టర్ ఫ్లాప్ అయిన సూపర్ సిక్స్ ని సూపర్ హిట్ అయినట్లు చంద్రబాబు గొప్పలు చెప్పుకుంటున్నాడు. నారా చంద్రబాబుకు భజన చేసే పత్రికలు ఆయన చాలా గొప్పవాడు అని ప్రచారం చేస్తున్నాయి. చంద్రబాబు అధికారంలోకి వచ్చిన తరువాత ఆయన, ఆయన కుమారుడు డబ్బు సంపాధించుకోవడం, వైయస్ఆర్సిపి కార్యకర్తలపై కక్ష సాధించడమే లక్ష్యంగా పెట్టుకుని పనిచేస్తున్నారు. అబద్దాల్లో చంద్రబాబు గిన్నీస్ బుక్ వరల్డ్ రికార్డుల్లో స్థానం సంపాధించుకునే స్థాయిలో ఉన్నాడు. విలువలు లేని వ్యక్తి. అధికారం కోసం ఎంతకైనా దిగజారే వ్యక్తి. చంద్రబాబు నంగనాచి కబుర్లు ఎవరూ నమ్మడానికి సిద్దంగా లేరు. అందుకు కారణమే చంద్రబాబు ఏడీఆర్ అనే సంస్థ ఈ దేశంలో నారా చంద్రబాబును మించిన ధనవంతుడైన సీఎం ఎవరూ లేరని రిపోర్ట్ ఇచ్చింది. రెండెకరాలతో ప్రారంభించిన ఆయన జీవితం లక్షల కోట్లకు ఎలా పెరిగింది. ఢిల్లీ నుంచి లోకేష్ స్పెషల్ ఫ్లైట్ లో వచ్చారు. ఇది ఎవరి సొమ్ముతో బుక్ చేశారు. దేశంలో అందరి సీఎంల ఆస్తులను కలిపితే చంద్రబాబు ఆస్తితో సమానం అని చెప్పారు. భారతదేశంలో ఎపీలో ఎన్నికలు అత్యంత ఖరీదైన వ్యవహరంగా ఉన్నాయి. దానికి కారణం చంద్రబాబు. తన అధికారం నిలబెట్టుకోవడం కోసం నోట్లతో రాజకీయం చేసిన దుర్మర్గమైన నాయకుడు. ఎన్టీ రామారావు హయాం నుంచి ఆయనను చూస్తున్నాను. ఎన్నికల ఖర్చు ఇంతగా పెరగడానికి కారణం చంద్రబాబు. ఎన్టీ రామారావును వెన్నుపోటు పొడిచి, అధికారంలోకి రావడానికి అడ్డదారులు తొక్కి, అనైతిక పనులు చేశాడు. బీసీ మంత్రి, ఎమ్మెల్యే పట్ల అవమానకరంగా వ్యవహరించారు. నూజివీడులో గౌతు లచ్చన్న విగ్రహం ఆవిష్కరణకు గౌడ సామాజికవర్గం వారు అందరూ వెడితే, మాజీ మంత్రి జోగి రమేష్ కూడా వెళ్ళారు. ఆయనతో పాటు ఆ కార్యక్రమంలో పాల్గొంటారా అని బీసీ మంత్రి పార్థసారధి, ఎమ్మెల్యే గౌతు శిరీష పట్ల నారా లోకేష్ తీవ్ర ఆగ్రహం వ్యక్తం చేశాడు. చివరికి వారు మాది తప్పే అంటూ వంగి వంగి పలుసార్లు క్షమాపణలు చెప్పే వరకు ఊరుకోలేదు. ఇది కక్షసాధింపు కాదా? ఇది చాలదూ అన్నట్లుగా విజయవాడలోని మాజీ ఎమ్మెల్సీ బుద్దా వెంకన్నతో ప్రెస్ మీట్ పెట్టించి వారిని ఎన్ని తిట్టాడో అందరూ చూశారు. ఏదైనా రాజకీయాలకు అతీతమైన కార్యక్రమానికి వెడితే కూడా ఊరుకోరా?
